زمااان كده ايام القناه الاولى وايام المسلسل بتاع الساعه 8 فاكرينو طبعا كان فى اعلان غريب كده بيجى فيه البت ومايكه جهاز كده اعده تتنطت على موسيقلا الاغانى.. وتيجى تقولك عايزنغمات لموبايلك هتلاقى عندنا اتصل ب0900..وانا اقعد ادور فى الاعلان على الموبايل ده انى الا قيه..!
لحد ما عرفت ان البتاع الصغير ده طلع اسمه موبايل
وبدات السنوات تتوالى ومعاها الاعلان ده وبقيت كلمه 0900 بتسمعها فى اليوم اكتر ما بتسمع اسمك بين اى مسلسل او قبل الماتش فى اى حته يحشرو كلمه 0900
حسيت انى وانا نايمه وبحلم الاقى يافطه سنعود ويجى اعلان 0900 فى نص الحلم
وبعدين بدأت بقى خدمات 0900 فى الزياده ربنا يكرمها يعنى 0900 للموبايلات الرنات ورسائل وبقى كمان فى الطبخ
بصو بقى
مش بتعرفى تطبخى وعايزه تتعلمة .. جوزك بيحب الباميه وانتى مش بتعرفى تطبخى الباميه .. سيبك منه
واتصلى ب0900
متختخه وكل ماحد يشوفك يقولك دبدوبه التخينه ولا يهمك الحل عندنا اتصلى ب0900
حياتك بؤس ومش طايق نفسك قبل ما تنتحر اتصل ب0900
صاحبتك قلبتك .. مراتك طلقتك.. جوزك ضربك.. أخوكولع فيك ومش عارفه تعمل ايه؟! اتصل ب0900
دول حتى مسبوش الضحك فى حالو لو عاوز تضحك ومش عارف متحتارش الحل عندنا اكيد خط الزغزغه اتصل ب0900
و كل ما يخطر على بال اى مواطن هتلاقيه فى 0900
فى التليفون فضفض متتكسفش!
وبدأت تتوغل فى كل أرجاء حياه الانسان حتى الخصوصيه
علاقاتك الزوجيه مش كويسه الايام دى 0900
زعلان من مراتك ليه يا راجل لا الحل عندنا اتصل ب0900
وبعد ما غطيت الحياه الخصوصيه للبنى ادم.. تسكت ؟! لا ازاى...
شفتلنا حاجه تانيه وكتر الف خيرها لقت حل تساعد بيه البشريه
أى سؤال عن دينك الاسلامى وعايز تعرفه اتصل ب0900
وكمان لو عايز رنات اسلاميه ودينيه وعايز خطب وتوشيح حاضر من عينى اتصل انت بس ب0900
يعنى الحمد الله كدا قدرت ستنا وتااااج رسنا 0900 انها تلبى خدمات البشريه كلها
لدرجه انى حسيت ان ممكن يطلعو فى يوم يقولك
عايز تعرف هتموت امتى اتصل 0900
ناس طيبين اوى وقدرو يحلو مشاكل الشعب كله
ونسيو الطبقه المطحونه اللى طالع عين ابوها !
يعنى مسمعتش عن 0900 معمول للشكاوى وخدمات الناس
يعنى يوصلو صوت المواطن ده او شكوته للمسؤل فلان او علان املا فى انه يحلها
وده يدل على ان 0900 قايمه على فكره تجاريه
بتدور على العالم الفاضى اللى مش وراها غير الهلس والعبط
وعجبى!
موضوع: اتصل ب0900 
الخميس أبريل 07, 2011 4:51 am
